रेशन कार्ड धारकांना ई-केवायसी पूर्ण करणे बंधनकारक

रेशन कार्ड धारकांना ई-केवायसी पूर्ण करणे बंधनकारक 

 कापूरहोळ : 

अत्यल्प उत्पन्न गटातील राष्ट्रीय अन्न सुरक्षा योजनेअंतर्गत अंत्योदय अन्न योजना व प्राधान्ययोजने अंतर्गत  शासकीय अनुदानित अन्न धान्याचा लाभ घेणाऱ्या सर्व रेशन कार्ड धारकांनी या योजनेचा लाभ सुरु ठेवण्यासाठी आपल्या रेशनकार्डमध्ये नोंदणी केलेल्या सदस्यांची  ई-केवायसी करणे बंधनकारक आहे.अन्यथा सदर योजनेचा लाभ बंद होणार आहे.

३१ मार्च २०२५ ही अंतिम मुदत असल्याने ही प्रक्रिया पूर्ण न करणाऱ्या लाभार्थ्यांना अनुदानित धान्य मिळणार नाही. तसेच, ई-केवायसी न करणाऱ्यांची नावे शिधापत्रिकेतून वगळली जातील. ई-केवायसी पूर्ण न केल्याने अन्नधान्याचा लाभ बंद झाल्यास त्याची सर्वस्वी जबाबदारी संबंधीत लाभार्थ्यांची राहील, 

ई केवायसी करा ,प्रशासनाचे आवाहन 

सर्व पात्र लाभार्थ्यांनी आपल्या गावातील रास्तभाव दुकानदारांशी संपर्क करुन तात्काळ ई-केवायसी पूर्ण करुन घ्यावी, असे आवाहन अन्न व नागरी पुरवठा व ग्राहक संरक्षण विभागाच्या वतीने करण्यात आली आहे.

भोर तालुक्यातील ४१ हजार नागरिकांचे e-KYC अद्याप अपूर्ण

भोर तालुक्यातील एकूण १ लाख १८ हजार ३३५ पैकी ४१ हजार २४८ नागरिकांचे e-KYC अद्याप पूर्ण झालेले नाही. रेशन कार्डधारकांनी अंतिम तारखेपूर्वी ३१ मार्च २०२५ पर्यंत e-KYC प्रक्रिया पूर्ण करावी, अन्यथा मोफत धान्याचा लाभमिळणार नाही. 

तालुका पुरवठा अधिकाऱ्यांनी यासाठी तातडीने कार्यवाही करण्याचे निर्देश दिले आहेत